Market Closed

नागढुंगा–मुग्लिन सडक विस्तार गरिंदै, अब ४ देखि ६ लेनसम्मको बन्ने

14 Feb,2020
  • Naubishe-Nagdhunga-_2_14_2020_5_23_14.jpg
 
 
 
काठमाडौं : नागढुंगादेखि मुग्लिनसम्मको ९४.७ किलोमिटर सडक स्तरोन्नति गरिने भएको छ । हाल १ देखि २ लेन चौडाइ रहेको सडकलाई ४ देखि ६ लेनसम्ममा विस्तार गर्न लागिएको हो । सडकमा साँघुरा मोड रहेकाले त्यसलाई समेत सुधार गरिने सडक विभागले जनाएको छ । मोड सुधार गर्दा सडकको लम्बाई नै केही घट्न जाने सडक विभाग, विकास सहायता समन्वय महाशाखाका प्रमुख अर्जुनज थापाले बताए । 
 
यस सडकमा सम्भव भएसम्म ६ लेन बनाइने छ भने नसकिने स्थानमा ४ लेनमा विस्तार गरिनेछ । उनले भने, “गजुरी, मलेखुलगायतका बजार क्षेत्रमा ४ लेन सडक बन्नेछ ।” सडक विस्तारका क्रममा २१ पुलसमेत निर्माण गरिने भएको छ । ती सबै पुल ४ लेनको हुनेछ । हाल भइरहेका पुल २ लेन मात्रै भएकाले त्यसलाई नभत्काई त्यससँगै ‘साइड’मा सडक जत्तिकै चौडाइको पुल निर्माण गर्न लागिएको हो ।

सोही परियोजना अन्तर्गत झण्डै १० वटा आकाशे पुल निर्माण गर्ने योजना रहेको छ । सो सडकखण्ड विस्तारका लागि विस्तृत परियोजना प्रतिवेदन (डीपीआर) एवं वातावरणीय तथा सामाजिक प्रभाव मूल्यांकन प्रतिवेदन (इएसआइए) तयार भइसकेको छ । नागढुंगा–नौबिसे–मुग्लिन सडकखण्ड रणनीतक सडक पहुँच तथा व्यापारिक सुधार आयोजनाअन्तर्गत स्तरोन्नति गर्न लागिएको हो ।

सडक त्रिभुवन राजपथ अन्तर्गत नागढुंगादेखि नौबिसेसम्म १२.७ किमी र पुथ्वी राजमार्गअन्तर्गत नौबिसे–मुग्लिन ८२.४ किमी रहेको छ । विश्व बैंकको ऋण सहयोगमा यो सडकखण्डको विस्तार गर्न लागिएको हो । सडक निर्माण भएको ५ वर्षसम्म सम्बन्धित निर्माण कम्पनीले नै सडकको मर्मतसम्भार गर्नुपर्ने प्रावधानसहित अन्तराष्ट्रिय बोलपत्र आह्वान गरिनेछ ।
 
१६ अर्ब रुपैयाँँ लाग्ने 
 
यो सडक निर्माणका लागि झण्डै १६ अर्ब रुपैयाँँ लाग्ने अनुमान गरिएको छ । यस सडक विस्तारका लागि ३ वर्ष लाग्ने अनुमान छ । यो सडक प्रदेश ३ को काठमाडौँ, धादिङ र चितवन जिल्लामा फैलिएको छ । काठमाडौँ जिल्लाको नागढुंगा चेकपोस्टबाट सुरु भएर नौबिसे, खानीखोला, महादेवबेसी, गल्छी, बैरेनी, मलेखु बेनीघाट, कुरिनटार हुँदै चितवन जिल्लाको मुग्लिनसम्म सडक पर्छ ।

सडक एसियाली राजमार्ग मापदण्ड अनुसार २ लेन, ७ मिटर ‘क्यारिजवे’ र १ देखि २.५ मिटरसम्म ‘सोल्जर’सहित स्तरोन्नति गर्न लागिएको हो । १ वर्षमा खरिद प्रक्रिया लगायतका आवश्यक कागजी प्रक्रिया पूरा गर्ने र अर्को वर्षदेखि सडक विस्तार गरिने योजना रहेको विभागले जनाएको छ । यस सडकको विस्तारको तयारीसँगै त्यसको विकल्पका रूपमा त्रिशूली नदी पारिपट्टिको सडक निर्माणको योजना बनाइएको छ ।

राजमार्गको समानान्तरमा गल्छीदेखि विशालटारम्म २ लेनको सहायक सडक निर्माण गर्न लागिएको हो ।पहिले नै ट्रयाक खुलिसकेको सडक भएकाले यसलाई स्तरोन्नति गरेर सञ्चालनमा ल्याउन समस्या नहुने प्रमुख थापाले बताए । स्थानीय निकायले अहिले नै गल्छीदेखि मलेखुसम्म ट्रयाक खोलेर सञ्चालनमा ल्याएको छ । त्यसलाई २ लेन सडकका रूपमा विस्तार गरेर कालोपत्र गर्ने गरी तयारी अघि बढाइएको छ । उनले भने, “मलेखुबाट विशालटारसम्म पनि ट्रयाक खोल्न समस्या छैन ।”
 
नागढुंगा–मुग्लिन सडक सरकारले ६ लेन विस्तारको तयारी गरिरहे पनि बजार क्षेत्रमा ४ लेनभन्दा विस्तार गर्न नसकिने हुँदा वैकल्पिक रूपमा पारिपट्टि पनि सँगसँगै निर्माण गर्न लागिएको हो । कतिपय स्थानमा भौगोलिक अवस्थाका कारण ४ लेनमा विस्तार गर्न नसकिने अवस्थाले यो सडकलाई विकल्पका रूपमा अघि बढाइएको हो । हाल पनि ठाउँठाउँमा पुल रहेको र आगामी दिनमा निर्माण हुने पुलले वारिपारि गर्न कुनै समस्या नहुने प्रमुख थापाले बताए ।

उनले भने, “यसले एकातिर स्थानीयवासी लाभान्वित हुनेछन् भने अर्कातिर पृथ्वी राजमार्ग भएर हिँड्ने सवारीसाधन पनि पारिबाटसमेत आवतजावत गर्न सक्छन् ।” नयाँ संरचनाअनुसार नेपाल सरकारको अधिकार क्षेत्रमा रणनीतिक सडक मात्रै परेसँगै सरकारले सडकको स्तरोन्नतिलाई समेत ध्यान दिन थालेको छ ।

सरकारले २ वर्ष पहिलेनै २ लेनभन्दा कम चौडाइको सडक निर्माण नगर्ने निर्णय गर्दै भएका सडकको विस्तार सुरु गरेको हो । त्रिभुवन राजपथ, पुथ्वी राजमार्ग, धुलिखेल–सिन्धुली–बर्दिवासलगायतका विभिन्न सडक विस्तारका क्रममा रहेका छन् । 
 
रासस
 

Post Your Comment