सेयर बजारमा फेरि रौनक देखिन थालेको छ । यसको प्रमुख कारण भनेको विस्तारै अब सिजन पनि सुरु हुन थालेको हो । सामान्यतयः चैत–वैशाखदेखि सेयर बजारको सिजन सुरु हुन्छ । सिजनमा अधिकांश वर्ष सेयर भाउ बढेको छ । विगत १४ वर्षको अध्ययन गर्ने हो भने १२ वर्षमा चैत–वैशाखापछि सेयर बजार बढेको छ । यसबाहेक बजारलाई निर्वाचनले पनि तानेको हो । विगतकै उदाहरण हेर्ने हो भने पनि २०५० सालपछि तीन वटा संसदीय चुनाव भएका छन् । चुनावी वर्षमा सेयर बजार बढेकै छ । अहिले स्थानीय निकाय निर्वाचन हुने तयारीमा छ । स्थानीय चुनावमा पनि ठूलोमात्रामा पैसा बजारमा आउने देखिएको छ । बजारमा पैसा आउँदा पर्याप्त तरलता हुने भएकाले बैंकले हाल लिइरहेको चर्को ब्याजदर घटाउने अपेक्षा गर्न सकिन्छ । ठूला लगानीकर्ताले यसको पूर्वअनुमान गरिसकेका हुन सक्छन् ।