Market Closed

१० वर्षभित्र १५ हजार मेगावाट विद्युत उत्पादन गर्ने सरकारको लक्ष्य

13 Jan,2020
  • Hydropower-projects_1_13_2020_4_58_54.jpg

 
काठमाडौं : ऊर्जा, जलस्रोत तथा सिँचाइमन्त्री वर्षमान पुनले नेपालमा जलविद्युत क्षेत्रमा लगानी गर्न अन्तर्राष्ट्रिय समुदायलाई अपिल गरेका छन् । युएइको अबुधाबीमा जारी अन्तर्राष्ट्रिय नवीकरणीय ऊर्जा संघको १० औं साधारण सभामा उनले नयाँ संविधान जारी भएसँगै नेपालमा राजनीतिक स्थायित्व कायम भएको तथा नेपाल कम्युनिष्ट पार्टी (नेकपा) नेतृत्वको सरकारले लगानीमैत्री वातावरण निर्माण गरेको बताए । जलविद्युत क्षेत्रमा लागानीमैत्री वातावरण निर्माण गर्न सरकारले कानुनी सुधार, क्षेत्रीय बजार विस्तार तथा विद्युत नियमन आयोग स्थापनाजस्ता काम गरेको उनको भनाइ छ ।

मन्त्री पुनले सार्वजनिक निजी साझेदारीमा जलविद्युतमा लगानी प्रवद्र्धन गर्ने नेपाल सरकारको नीति रहेको चर्चा गर्दै ढुक्क भएर नेपालमा लगानी भित्र्याउन पनि आग्रह गरे । सरकारले १० वर्षमा १५ हजार मेगावाट विद्युत उत्पादनको लक्ष्य राखेको भन्दै उनले आन्तरिक बजारमै विद्युत खपतका लागि विभिन्न योजनासमेत अघि सारिएको उल्लेख गरे । उनले विद्युत खपत बढाउन विशेष आर्थिक क्षेत्रमा कर छुट, विद्युतीय सवारी प्रवद्र्धन र चार्जिङ सेन्टर स्थापना गर्न लागिएको समेत बताए । 
 
संघलाई नेपालमा लगानीका लागि सहयोग जुटाइदिन आग्रह गर्दै मन्त्री पुनले विद्युत उत्पादन गर्न, प्रसारण लाइन निर्माण तथा वितरण गर्न सस्तो र प्रभावकारी प्रविधि स्थापनामा सघाउन अनुरोध गरे । अर्को फरक प्रसंगमा मन्त्री पुनले जलवायु परिवर्तनका कारण हिउँ पग्लने क्रम बढेकामा चिन्ता प्रकट गर्दै ऊर्जा क्षेत्रको सुरक्षाका लागि त्यसलाई रोक्न गर्नुपर्ने काममा गम्भीर हुन सबैको ध्यानाकर्षण गराए । 
 
करिब १२० मुलुकका मन्त्री सहभागी सभामा नेपालका तर्फबाट मन्त्री पुनको नेतृत्वमा प्रतिनिधिसभा सदस्य राधाकुमारी ज्ञवाली, राजबहादुर बुढा, भूमि त्रिपाठी तथा युएईका लागि नेपाली राजदूत कृष्णप्रसाद ढकाल, ऊर्जा मन्त्रालयका सहसचिव मधुप्रसाद भेटुवाल, बैकल्पिक ऊर्जा प्रवद्र्धन केन्द्रका कार्यकारी निर्देशक मधुसुदन अधिकारी र मन्त्री पुनका प्रमुख स्वकीय सचिव दुर्गाप्रसाद चापागाईं सहभागी रहेका छन् ।  
 
रासस
 

Post Your Comment